ABRIL 6, 2025

IKA – 5 NGA DOMINGO SANG KWARESMA

 

NAHAUNA NGA BALASAHON

Isa. 43: 16-21

 

Balasahon gikan sa Libro ni Isaias nga Propeta.

 

Sang una anay ang Ginoo naghimo

Sing isa ka dalan sa dagat,

Isa ka alagyan sa tunga

Sang nagaalimbukad nga tubig.

Gindala niya ang gamhanan

Nga mga hangaway sa kalaglagan,

Ang mga hangaway

Nga may mga karuwahi kag mga kabayo.

Nagkalapukan sila,

Kag indi na gid makabangon,

Ginpalong kaangay sang siga

Sang isa ka kandila!

 

Pero ang Ginoo nagasiling,

"Indi kamo magsalig

Sa mga hitabo sang una

Ukon magpanumdom sang mga butang

Sang una nga panahon.

Tan-awa ninyo

Ang bag-o nga mga butang

Nga akon pagahimuon.

Nagakahanabo na ini---

Kag makita na ninyo karon!

Magahimo ako sing dalan sa desierto,

Kag hatagan ko kamo sing tuboran

Sang mga tubig didto.

Bisan ang mga sapat nga talunon

Magapadungog sa akon;

Mga talunon nga ido kag mga ostrit

Magadayaw sa akon

Kon maghimo ako

Sing mga suba sa desierto,

Sa paghatag sing tubig

Sa akon pinili nga mga tawo.

Sila ang mga tawo nga ginhimo ko

Para sa akon kaugalingon---

Kag sila magaamba

Sa pagdayaw sa akon!"

 

 

Ang Pulong sang Dios.

 

 

KALANTAHON SA PAGSABAT

Sal. 126: 1-2; 2-3; 4-5; 6

 

S. Ang Ginoo naghimo sing mga katingalahan para sa aton, sa sini nagkinasadya kita.

 

Sang ginpabalik kita sang Ginoo sa Sion,

daw isa lang yadto ka dalamguhanon!

Daw ano ang aton pagkinadlaw kag pagkinanta sa kalipay! (S.)

 

Dayon ang iban nga mga pungsod nagsiling nahanungod sa aton,

"Ang Ginoo naghimo sing dalagku nga mga butang sa ila!"

Matuod gid naghimo sia sing dalagku nga mga butang sa aton,

daw ano kita sadto ka malipayon! (S.)

 

O Ginoo, dalha kami pabalik sa amon duta,

subong nga ang imo ulan nagadala sang tubig pabalik sa mamala nga mga suba.

Himoa man nga yadtong nagtanom nga nagahilibion,

magtipon sang patubas nga may kasadya! (S.)

 

Yadtong mga naghibi samtang nagagowa sila nga nagadala sing binhi

magabalik nga nagakanta sa kalipay,

nga nagadala sang ila patubas! (S.)

 

 

IKADUHA NGA BALASAHON

Fil. 3: 8-14

 

Balasahon gikan sa Sulat ni San Pablo nga Apostol, sa mga taga – Filipos.

 

Indi lamang yadto nga mga butang, kundi ang tanan ginakabig ko nga kapiyerdihan tungod sa labi pa gid ka malahalon nga butang, nga amo ang pagkilala ko kay Cristo Jesus nga akon Ginoo. Tungod sa iya ginasikway ko ang tanan, kag ginakabig ko nga basura, agod maangkon ko si Cristo, kag agod nga mangin-isa kami sing bug-os. Wala na ako sang akon kaugalingon nga pagkamatarong nga maangkon paagi sa pagtuman sang Kasugoan, kundi ang pagkamatarong nga maangkon paagi sa pagtuo kay Cristo, ang pagkamatarong nga nagagikan sa Dios kag napasad sa pagtuo. Ang akon lamang layag amo ang pagkilala kay Cristo, kag ang pag-agom sang gahom sang iya pagkabanhaw, ang pag-ambit sang iya mga pag-antos, kag ang pagkapatay subong sang iya pagkamatay, sa paglaom nga mabanhaw ako gikan sa mga minatay.

 

Wala ako nagasiling nga nalambot ko na ini, ukon nga nanginhimpit na ako. Nagapadayon ako sa pagtinguha sa pag-angkon sang premyo nga tungod sini naangkon ako ni Cristo Jesus. Matuod gid, mga kautoran, wala ako nagahunahona nga nalambot ko na ini, kundi ang akon ginahimo amo ang paglimot sang tinalikdan kag ang paghimulat sa paglambot sang ginaatubang ko. Gani nagadalagan ako sing tadlong padulong sa lalambuton agod madaog ko ang premyo, nga amo ang pagtawag sang Dios paagi kay Cristo Jesus sa kabuhi sa langit.

 

Ang Pulong sang Dios.

 

 

BERSIKULO ANTES ANG EBANGHELYO

Joel 2: 12-13

 

Gani karon, siling sang Ginoo, magbalik kamo sa akon sa bug-os nga tagipusoon, kay ako labi ka mapinalanggaon kag maluloy-on.

 

 

EBANGHELYO

Juan 8:1-11

 

Balasahon gikan sa Santos nga Ebanghelyo suno kay San Juan.

 

Sa tapos sadto ang tagsatagsa nagpauli, pero si Jesus nagkadto sa bukid sang mga Olivo. Madulomdulom pa sang madason nga aga nagbalik sia sa templo. Ang tanan nga mga tawo nagtipon sa iya palibot, kag naglingkod sia sa pagpanudlo sa ila. Ang mga manunodlo sang Kasugoan kag ang mga Fariseo nagdala didto sang isa ka babayi nga nadakpan nga nagapanginlalaki, kag ginpatindog nila sia sa atubangan sang tanan nga mga tawo. Nagsiling sila kay Jesus, "Manunodlo, nadakpan ini nga babayi nga nagapanginlalaki. Suno sa Kasugoan ni Moises ang amo nga sahi sang babayi dapat batuhon tubtob mapatay. Karon, ano bala ang masiling mo?" Ginsiling nila ini sa pagdakupdakop sa iya, agod nga may isumbong sila batok sa iya. Pero nagdungok si Jesus kag nagsulat sia sang iya tudlo sa duta. Sang sagad sila pamangkot sa iya, si Jesus nagtungkaaw kag nagsiling sa ila, "Kon sin-o sa inyo ang wala sing sala, amo ang mag-una haboy sa iya sing bato." Kag nagdungok sia liwat kag nagsulat sa duta. Sang pagkabati nila sini, isaisa nga naghalalin sila tanan, sugod sa mga tigulang. Si Jesus na lang ang nabilin kag ang babayi nga nagatindog pa didto. Nagtungkaaw si Jesus kag nagsiling sa iya, "Babayi, diin na bala sila? May yara pa bala nga nagakondenar sa imo?"

 

Nagsabat sia, "Sir, wala na gid bisan isa." Si Jesus nagsiling, "Ako wala man nagakondenar sa imo. Lakat ka, pero indi ka na magpakasala liwat."

 

Ang Ebanghelyo sang Ginoo.